Korleis vi kan tenke om vippepunkt i klimasystema er eitt av to tema Noradapt tek opp på Arendalsuka 2025.
Vestlandsforsking held fem arrangement om klima og miljø på årets utgåve av Arendalsuka, og Noradapt spelar ei sentral rolle i to av arrangementa. Du finn oss i bakgarden til GRID-Arendal torsdag 14. august.
Vippepunkt for klimatilpassing
Torsdag 14. august kl. 10-10.45 på GRID-Arendal og på nettet
I ei uroleg verd der det er meir usikkerheit rundt klimamål og ambisjonar, må vi ta omsyn til verstefalls-scenario for klimagassutslepp. Så langt har «vippepunkt» først og fremst vore belyste i den naturfaglege klimaforskinga, med analysar av korleis effektane av klimaendringar kan få klimasystema til å nå eitt eller fleire «vippepunkt» som set i gang dramatiske konsekvensar som ikkje let seg stoppe.
Frans Berkhout er professor i miljø, samfunn og klima ved King’s College London og medlem av Noradapt sitt internasjonale vitskapsråd.
I denne debatten vil vi utfordre berøringsangsten for vippepunkt innan samfunnsforsking og politikk. Vi spør korleis samfunnet bør stille seg til denne typen dramatiske utsikter og utslag av klimaendringane.
Leiande seniorforskar og leiar av Noradapt, Carlo Aall (Vestlandsforsking/Noradapt) leier debatten, der også Kikki Kleiven (Bjerknessenteret), Kristoffer Hansen (statssekretær i Klima- og miljødepartementet (Ap)), Thina M. Saltvedt (Nordea) og Brigt Dale (Nordlandsforskning/Noradapt) vil delta. Før debatten vil Frans Berkhout, professor ved King’s College i London, halde eit innlegg. Berkhout er medlem av Noradapt sitt internasjonale vitskapsråd.
Klimarisiko, handel og sikkerheit: når fleire kriser skjer samstundes
Torsdag 14. august kl. 13-13.45 på GRID-Arendal og på nettet
Når verdssituasjonen er utstabil og oppslutninga rundt ein ambisiøs klimapolitikk går ned, kan det fort oppstå situasjonar der kriser knytt til sikkerheit og klima skjer samtidig og forsterkar kvarandre. Debatten vi inviterer til, tek opp samanhengen mellom arbeidet for å styrke totalberedskapen og redusere grenseoverskridande klimarisiko, dvs. problem som blir utløyste av klimaendringar i eitt land og får konsekvensar i andre land, for mange ein «ny» type klimarisiko. Eit mykje brukt døme er reduserte soyaavlingar i Brasil som følge av klimaendringar, som gir dyrare kraftfôr for dei som driv husdyr- eller fiskeoppdrett i Noreg.
Kva skjer i norsk husdyr- og fiskeoppdrett når klimaendringane gir svekka soyaavlingar i Brasil?
Katy Harris (Stockholm Environment Institute), Brigt Dale (Nordlandsforskning) og Carlo Aall (Vestlandsforsking) vil innleie om samanhengar mellom global sikkerheit, grenseoverskridande klimarisikoar og utmarksbasert husdyrproduksjon.
Deretter vil Haavard Stensvand (Statsforvaltaren i Vestland), Grete K. Hovelsrud (Nordlandsforskning), Truls Gulowsen (Naturvernforbundet) og Martin Aarnæs (NATO Climate Change and Security Centre of Excellence) diskutere samanhengar mellom totalberedskap og klimarisiko i andre land, og korleis vi kan handtere desse utfordringane under eitt.
Vestlandsforsking held fleire arrangement i GRID-Arendal sine lokale denne dagen. Vi inviterer òg på klimalunsj kl. 12. Her finn du ei oversikt over dagen!