3. og 4. mai 2023 arrangerte vi konferansen Klimaomstilling 2023 i Sogndal i lag med samarbeidspartnarar i Vestland fylke. Dette var den åttande utgåva av konferansen, som har eit nasjonalt fokus. Den er tverrfagleg, meint for eit breitt publikum og famnar både arbeid med utsleppsreduksjon og tilpassing til klimaendringar.

I 2023 hadde vi 160 deltakarar og flotte rammer, med strålande sol. Her kan du sjå bilete frå dei to dagane i Sogndal (foto: Idun A. Husabø og Kyrre Groven).

Arrangørane venta kring 160 deltakarar til den åttande utgåva av konferansen (foto: Idun A. Husabø)

Arild Sondre Sekse frå Vestland fylkeskommune var konferansier under Klimaomstilling 2023 (foto: Idun A. Husabø)

Kikki Kleiven frå Bjerknessenteret heldt opningsinnlegget. Der skisserte ho kor Noreg og verda står med tanke på å oppfylle klimamåla for 2030. (foto: Idun A. Husabø)

Store kutt kvart år må til dersom vi skal ha ein reell sjanse til å nå dei utsleppskutta Noreg har forplikta seg til. Kikki Kleiven frå Bjerknessenteret talfesta kutta vi må gjere kvart år. (foto: Idun A. Husabø)

Kvar ligg vippepunkta i den globale oppvarminga? Innlegget til Kikki Kleiven gjorde inntrykk på forsamlinga. (foto: Idun A. Husabø)

Kor stor oppvarming toler ulike deler av verda? Kva ligg vi an til å gå mot? (foto: Idun A. Husabø)

Professor Simon Neby frå Universitetet i Bergen forklarte kvifor klimaproblemet ofte blir skildra som spesielt gjenstridig eller flokete. (foto: Idun A. Husabø)

Mari Helliesen frå Institutt for sammenliknende politikk ved Universitetet i Bergen tok for seg korleis demokratiet vårt fangar opp folk sitt syn på kva vi br gjere med klimaendringane. (foto: Idun A. Husabø)

Mari Helliesen i samtale med konferansier Arild Sondre Sekse etter innlegget om demokrati og klimakrise, der det mellom anna kom fram at unge og kvinner generelt er meir positive til klimatiltak enn dei folkevalde som skal representere befolkninga. (foto: Idun A. Husabø)

Jørgen Pedersen (HVL), Tone Smith og Arild Vatn (NMBU) i samtale med Carlo Aall om vekst og klima. Kva vil nedvekst eller motvekst kunne bety for klimakrisa? (foto: Idun A. Husabø)

Panelsamtalen mellom Jørgen Pedersen (HVL), Tone Smith og Arild Vatn (NMBU) tok for seg nedvekst eller motvekst. (Foto: Idun A. Husabø)

Thea Gregersen ved Norce snakka om ulike måtar klimaskepsis kan arte seg på (foto: Idun A. Husabø)

Frå parallellsesjonen om sosial rettferd. (Foto: Idun A. Husabø)

Ellen Eimhjellen Blom frå Høgskulen på Vestlandet presenterte forskingsprosjektet Samskaping for eit berekraftig Sogn i parallellsesjonen om sosial rettferd (Foto: Idun A. Husabø).

Seniorforskar Kyrre Groven (t.h.) stilte ut foto av stader i Sogndal i dag og for 30 år sidan. Groven har leidd eit forskingsprosjekt om berekraftig tettstadutvikling. Der stod Sogndalsfjøra, Horten og Malvik i fokus. Journalist Inger Helgestad (t.v.) frå Porten intervjua Groven i samband med tettstadvandringa 3. mai. (Foto: Idun A. Husabø)

Konferansier Arild Sondre Sekse frå Vestland fylkeskommune oppsummerte dagen 3. mai saman med kollega Ida-Beate Mølmesdal. (Foto: Idun A. Husabø)

Tone Rusdal frå Vestlandsforsking har planlagt og koordinert konferansen Klimaomstilling gjennom fire år. I mai 2023 går ho over til Sandnes kommune, der ho er rådgjevar for klimaomstilling. (Foto: Idun A. Husabø)

Masterstudentane i Climate Change Management stilte ut posterar i foajeen utanfor konferanselokala (Foto: Idun A. Husabø).

Frå tettstadvandringa under bolken “aktiv pause” 3. mai. Markus Mohn Werner frå Sogndal kommune deltok som omvisar saman med Kyrre Groven (Vestladsforsking) og Inger Auestad. (Foto: Kyrre Groven)

Frå tettstadvandringa 3. mai. Inger Auestad forklarte mellom anna at talet på tre har endra seg i Sogndalsfjøra dei siste 30 åra. Sentrum har til dømes fått færre frukttre. Ho peikte mellom anna på korleis store tre gir skugge på varme dagar og aukar naturmangfaldet i dei tettbygde delane av Sogndal. (Foto: Kyrre Groven)

Konferansen tilbydde tre aktivitetar i den “aktive pausen”, der den eine var ein tur til dagsturhytta med Naturvernforbudet i Indre Sogn. Undervegs heldt representantar for organisasjonen små innlegg. (Foto: Idun A. Husabø)

Ved dagsturhytta med Naturvernforbudet i Indre Sogn. (Foto: Idun A. Husabø)

På klimakvelden 3. mai stod professor og forfattar Espen Ytreberg frå Universitetet i Oslo for eitt av innslaga. (Foto: Idun A. Husabø).

Carlo Aall stod for bokbadet med Ytreberg, der dei to trekte parallellar mellom kvalfangsten og dagens oljealder, med utvinning av olje og gass. (Foto: Idun A. Husabø)

Ytreberg kjem med boka “Utryddelsen” i august 2023. Der tek han for seg kvalfangsthistoria, eller “Noreg sin første oljealder”. (Foto: Idun A. Husabø)

Skotske Calum Macintyre er snøbrettkøyrar og gründer, og sterkt engasjert i å få ei slutt på leiting etter nye olje- og gassfelt. Han snakka om kvifor han har engasjert seg i Stopp Oljeleitinga Sogndal. Verda har kort tid på oss, og no vi må handle, var bodskapen til Macintyre. (Foto: Idun A. Husabø)

Scenekunstnar Amund Sjølie Sveen heldt førestillinga “Economics for dummies” under klimakvelden 3. mai. (Foto: Idun A. Husabø)

Frå “Economy for dummies” av Amund Sjølie Sveen (Foto: Idun A. Husabø)

Arrangør Tone Rusdal passa tida frå første rad. (Foto: Idun A. Husabø)

Carlo Aall frå Vestlandsforsking snakka om klimavern, altså å verne visse typar areal mot arealbruksendringar av omsyn til klimaendringane. Eit godt døme er myr, som både beskyttar mot flaum og tørke og har stor verdi med tanke på naturmangfald. Drenering betyr dessutan frigjering av karbon. (Foto: Idun A. Husabø)

Torunn G. Hønsi (til venstre) og Jan Ketil Rød (NTNU, Institutt for geografi) er sentrale i fou-prosjektet Vannklimrisk, der målet er å gjere det enklare for kommunar over heile landet å finne stader med forureining i grunnen og hindre utslepp av farlege miljøgifter til naturen. Risikoen for at stoffa kjem på vidvanke i naturen har auka med meir nedbør og styrtregn. (Foto: Idun A. Husabø)

Jan Ketil Rød (NTNU) viser funksjonane i Miljøgiftkartleggeren, verktøyet forskarar har utvikla i tett samarbeid med forvaltninga gjennom Vannklimrisk. Dette var tema for ein eigen parallellsesjon 4. mai. (Foto: Idun A. Husabø)

Paneldiskusjon om korleis næringslivet kan bli ein større del av klimaomstillinga, med representantar for Innovasjon Norge, Grøn region Vestland, Norengros, Sparebanken Sogn og Fjordane og Klimapartnere Vestland. (Foto: Idun A. Husabø)

Eivind Brendehaug ved Vestlandsforsking stiller spørsmål til ein innleiar. (Foto: Idun A. Husabø)